മനുഷ്യൻ DOT COM: മാറിയ ലോകവും മാഞ്ഞുപോകുന്ന മനുഷ്യത്വവും

കാലം അതിന്റെ കുത്തൊഴുക്കിൽ മുന്നോട്ട് പോകുന്നു. സാങ്കേതികവിദ്യയുടെ കുതിച്ചുചാട്ടം നമ്മുടെ ലോകത്തെ അക്ഷരാർത്ഥത്തിൽ മാറ്റിമറിച്ചു. മൊബൈൽ ഫോണുകളും മെറ്റാവേഴ്സും, എന്തിന്, എലോൺ മസ്കിന്റെ സ്വപ്നതുല്യമായ കാഴ്ചപ്പാടുകൾ പോലും നമ്മെ വിസ്മയിപ്പിച്ചുകൊണ്ടിരിക്കുന്നു. എന്നിട്ടും, ഈ പുരോഗതിയുടെ പടവുകളിൽ നിൽക്കുമ്പോഴും, മനുഷ്യന്റെ ഉള്ളിൽ ചില പഴയ ചിന്തകൾ ഇന്നും അടിയുറച്ച് നിൽക്കുന്നു. ജാതിയും മതവും നോക്കി മനുഷ്യനെ അളക്കുന്ന ആ പഴയ ദൃഷ്ടി ഇന്നും മായാതെ നിലനിൽക്കുന്നു.

ഒരുകാലത്ത്, "സമാധാനത്തിനായി ജീവിക്കണം" എന്ന് ഒരു മനസ്സോടെ പാടിയവരായിരുന്നു നമ്മൾ. എന്നാൽ ഇന്ന് അതേ സമാധാനത്തിന്റെ പേരിൽത്തന്നെ നമ്മൾ ഏറ്റുമുട്ടുന്നു. ഓരോരുത്തർക്കും അവരവരുടെ കാഴ്ച്ചപ്പാടിലെ സമാധാനമാണ് ശരിയെന്ന് തോന്നുമ്പോൾ, അത് സംഘർഷങ്ങളിലേക്ക് വഴിമാറുന്നു.

മനുഷ്യനായതിൽ എന്ത് നഷ്ടം?

ഒരു നിരീക്ഷകന്റെ കണ്ണിലൂടെ നോക്കുമ്പോൾ മനസ്സിൽ ഒരു ചോദ്യം മാത്രം ഉയരുന്നു: മനുഷ്യത്വം എവിടെപ്പോയി? ഈ ചോദ്യം ഉയരുമ്പോൾ, നമ്മുടെ പുരോഗതിയുടെയും പരിണാമത്തിന്റെയും അടിത്തറയായ ചില മൂല്യങ്ങൾ ഓർമ്മയിലേക്ക് വരുന്നു:

• സ്നേഹം
• സഹനബോധം
• ഒത്തൊരുമ
• വിശ്വാസം

ഇന്നത്തെ കാലഘട്ടത്തിൽ ഈ മൂല്യങ്ങൾ ഓർമ്മകളിലോ പുസ്തകത്താളുകളിലോ "സോഫ്റ്റ് സ്കിൽസ്" എന്ന പേരിൽ പാഠശാലകളിലോ മാത്രം ഒതുങ്ങിപ്പോകുന്നു. എന്നാൽ യഥാർത്ഥത്തിൽ, ഈ മൂല്യങ്ങളാണ് നമ്മുടെ ജീവിതത്തിന്റെ അടിത്തറ. അവയെ മറന്നുപോകുന്നത് ഒരു വലിയ ദുരന്തമാണ്.

ഈ മൂല്യങ്ങൾക്ക് മുകളിൽ മറ്റൊരു കറുത്ത നിഴൽ കൂടി വീഴുന്നത് കാണാം — മയക്കുമരുന്നിന്റെ അമിതമായ ഉപയോഗം. ലഹരിയുടെ പിടിയിലമരുന്ന ഓരോ വ്യക്തിയും തനിക്കേറ്റവും പ്രിയപ്പെട്ട സൗഹൃദങ്ങളെയും, ബന്ധങ്ങളെയും, വിശ്വാസത്തെയും നഷ്ടപ്പെടുത്തുന്നു. അതൊരു വ്യക്തിയുടെ മാത്രമല്ല, ഒരു സമൂഹത്തിന്റെ തന്നെ തകർച്ചയിലേക്കുള്ള വഴിയാണ്. അകന്നുപോകുന്ന ബന്ധങ്ങളും അസ്തമിക്കുന്ന വിശ്വാസ്യതയും നമ്മുടെ സാമൂഹിക ഘടനയെത്തന്നെ ദുർബലമാക്കുന്നു.

പ്രത്യാശയുടെ കിരണങ്ങൾ

എങ്കിലും, എല്ലാം ഇരുണ്ടതല്ല. ഈ തലമുറയിലും ജാതിമത ചിന്തകളുടെ കെട്ടുപാടുകളിൽ നിന്നൊഴിഞ്ഞ്, ഹൃദയംകൊണ്ട് മനുഷ്യരെ സ്നേഹിക്കാനും പിന്തുണയ്ക്കാനും അറിയുന്നവരുണ്ട്. അവരുടെ ദർശനം നമ്മോട് പറയുന്നു: മാറ്റങ്ങൾ വീട്ടിൽ നിന്നും വിദ്യാലയങ്ങളിൽ നിന്നും ആരംഭിക്കണം. ബാല്യം നമ്മുടെ മനസ്സിനെ വളർത്തുന്ന കാലഘട്ടമാണ്. അതുകൊണ്ട്, വിദ്യാലയകാലം മുതലേ സ്നേഹം, സഹകരണം, ആത്മാർത്ഥത എന്നീ മൂല്യങ്ങൾ പ്രാധാന്യത്തോടെ പഠിപ്പിക്കണം. ഈ മൂല്യങ്ങളെ മുറുകെപ്പിടിച്ച്, ലഹരിയുടെ കെണിയിൽ നിന്ന് യുവതലമുറയെ സംരക്ഷിക്കേണ്ടത് നമ്മുടെയെല്ലാം കടമയാണ്. പുതിയ തലമുറയിൽ ഈ നല്ല മാറ്റങ്ങൾ പ്രതീക്ഷ നൽകുന്നു.

ഉയരുന്ന ചോദ്യങ്ങൾ

നാം എല്ലായ്പ്പോഴും "ഓരോ മനുഷ്യനും തുല്യനാണ്" എന്ന് വാക്കുകൾകൊണ്ട് ആവർത്തിക്കുന്നു. ഈ വാക്ക് ശരിയാണെങ്കിലും, നമ്മുടെ പെരുമാറ്റങ്ങൾ അതിനെ പിന്തുടരുന്നുണ്ടോ എന്നത് ചിന്തിക്കേണ്ട വിഷയമാണ്. സത്യം ചോദിക്കേണ്ടത് ഇതാണ്: നമുക്ക് മനുഷ്യനായി ജീവിക്കാൻ സാധിക്കുമോ, അതോ മനുഷ്യനാകാൻ ഒരു സർട്ടിഫിക്കറ്റ് മാത്രം മതിക്കുന്ന ഒരു കാലത്തിലേക്ക് നാം കടക്കുകയാണോ?

ജാതിയുടെയും മതത്തിന്റെയും ലഹരിയുടെയും പേരിൽ ഓടിക്കൊണ്ടിരിക്കുന്ന മനുഷ്യരാശിയുടെ പിന്നിൽ നിന്ന് ഒരു എഴുത്തുകാരൻ.